القاهره .رائد عبدالسلام
– كل خروجة خميس تفرتك لك خمسة جنيه ؟! ما بين سينما وتسالي وسندوتشات ونروّح في تاكسي عدّاد كمان ..احنا فـ قفا كل قرش يا حبيبي ،الحاجة غالية نار في السوق ،ماما لسه شارية امبارح أطقم كوبايات وحاجات للمطبخ باتناشر جنيه والخِتمة الشريفة !!
– يا حبيبتي ربنا ح يدبّرها ،ده يوم أجازتي الوحيد من المصنع وهو اللي بنخرج فيه !!
– مش كنا حجزنا بالفلوس دي تلاجة “إيديال” ولّا تليفزيون ونستلمهم كمان سنة على معاد جوازنا !!
– ده كلام خالتي .. صحّ ؟!
هوّ كل خروجة تنكدي عليّا وتحسبيها بالمليم ؟!
– يعني انا اللي بوز نكد ؟! واللا انت اللي إيدك مخرومة ومش حنتجوز في سنتنا !!
– تصدقي أنا غلطان ..فيه غيري بيشربوا بالخمسة جنيه دول سجاير في الشهر ولا على بالهم ..وأنا حارم نفسي من شيرز جديد عشان خاطرك !!
– طب خلاص حقّك عليّا .. على فكرة السميط مقرمش وطعمه حلو أوي
– مش أحلى منك يا قمر ..
الرصيف فاضي آهو والدنيا أمان ..إدّيني واحدة بأة
“رائد”
