١- متصدقش اي وعود حواليك غير لما تبقي علي أرض واقع
٢- احترم كل زمايلك مهما كان فرق الترتيب الوظيفي بينكم
٣- بلاش تاخد مشاكل الشغل للبيت
مراتك وولادك ملهمش ذنب وانت كمان متشيلش نفسك فوق طاقتها وحاول ( تفصل ) وانت داخل بيتك واوعي تاخد مشاكل البيت للشغل
٤- عشان محدش يمسك عليك غلط خليهم في الشغل يظبطوا عليك الساعه من ( مواعيدك ) ويا ريت لو تطبقها في حياتك كلها هتفرق معاك جدا
٥- لو بيتقال عليك انك علي نياتك يبقي خليك في السليم وبلاش علاقات شخصية في محيط العمل ويكفي زمالة مهنية محترمة
٦- متتعشمش اوي في اللي حواليك و لو حد ساعدك من زمايلك فاشكره وكتر خيره ولو مفيش حد يساعدك
ده احسن لان هيخليك تجتهد وتفهم وتعرف الشغل لوحدك
٧- عايز تترقي في شغلك وتكبر فيه اجتهد واسعي واعمل اللي عليك في شغلك وربنا كبير .. لو فيها خير ليك هتجيلك لحد عندك ولو مفيهاش فربنا كبير هيعوضك بأحسن منها
٨- متخليش حياتك كلها مقفوله علي الشغل وبس يعني مش من شغلك لبيتك ومن بيتك لشغلك .. امك وابوك و مراتك وولادك ليهم حق عليك والزيارات العائليه وصله الرحم لا تقطعها مهما كان .. ده رصيدك الحقيقي في الدنيا
٩- متشلش هم وانت لسه في اول الشهر .. هو المرتب هيعمل ايه ولا ايه ده المرتب كله ديون مفيهوش .. ومش بيكفي لنص الشهر .. لكن البركة في الفلوس فيها الرزق كله ودي حاجة هتعرفها مع الوقت لكن المهم اعمل اللي عليك ورزقك ورزق بيتك هيجيلك..هيجيلك
١٠- خليك عارف .. اي شغل مش عيب مادام حلال ومفيد انسي الناس .. ونظره الناس .. ومتفكرش هو انا لو اشتغلت الشغل ده الناس هتبصيلي ازاي
يمكن بشغلتك دي انت عند ربنا احسن من نااااس كتير اوي في مراكز عاليه
وأخيرا
الأيام اللي احنا فيها لو حد يقدر يساعد حد قاعد من الشغل دي أجرها كبير وعظيم اوووي عند ربنا وخصوصا لو قدر يوفر له شغل
واللي في شغلانه دلوقتي يجتهد انه يرضي ضميره وربه وبس و اعمل اللي عليك وسيب الباقي علي ربنا
واللي قاعد من الشغل بس بيسعي ويجتهد انه يشتغل اي شغلانه مفيدة ربنا هيكرمه وهيرزقه إن شاء الله علي اد سعيه واجتهاده
ده وعد ربنا له لقوله تعالي
“وأن ليس للإنسان إلا ما سعى”
