جن الرصد
مقابر القدماء المصريين وعلاقتها ب جن الرصد/ جن حارس الكنوز والمقابر/ الجن المانع / الجن حارس المال .
كلنا طبعا بنسمع عن الجن ماهو مذكور في القرآن .
لكن.
النهارده انا هتكلم عن الجن حارس المال،اقصد الجن المانع،لا اقصد الجن حارس الكنوز، باختصار كده هتكلم عن جن الرصد.
ايه هى حكايه جن الرصد دى؟
بشويش كده و واحده واحده علشان الموضوع طويل.
جن الرصد دى مش نوع واحد لا دول نوعين اتنين ايوه والله زى ما بقولك كده يعنى انا هكدب عليك.
اول نوع : الجن المكلف هو جن بيتم تكلفته من اصحاب الكنوز ل حراسه شويه كنوز وذهب و الماظ وياقوت .
ودى بردو كان بيحصل ايام المصريين القدماء علشان يحموا مقابرهم اللى مليانه كنوز من السرقه والنهب.
فى من خلال تعاويذ و طلاسم معينه وشويه بخور اصل الجن بيعشق البخور .
يتم تسخير الجن ل حراسه الكنوز دى فى ميقدرش يقرب منها أنسان اي كان .
طيب نفترض واحد كده قل عقله وقرب من الكنز دى ايه اللى هيحصل ليه؟
هيفضل الجن دى يضايق في يضايق فى يضايق فى لحد ما يزهق و يمشي من المكان.
تانى نوع: الجن الغير مكلف دى بقى بيبقى جن ماشي كده فى حاله قوم ايه؟ لقى شويه كنوز وشم ريحه العتيق .
يقول!
بس المكان دى بتاعى والكنز دى كنزى ومش هتعتع من هنا .
طبعا ساعتها مش هتقدر تخد منه اي حاجه.
طيب نكلم بقا فى المفيد !
اي هى انواع جن الرصد دى؟
فى الحقيقة هما أنواع كتير!!!
أول نوع : العبد الأسود ودى جن على شكل عبد أسود وهو من اقوى انواع الحراسه ودايما بيطلب الأضحية بتاعته تبقى من الدم من الاخر كده بيبقى عايز دم بشرى.
النوع التانى: القرد الممسك ب سلسله وهو بردو شرير زى العبد الأسود بظبط.
النوع الثالث: ود بقا الجن المتشكل مره بيبقى على هيئة ديك بحجم الخروف ومره على هيئة ارنب كبير.
النوع الرابع: بيبقى على هيئة أفعى عملاقة دى بقا ممكن تخد و تدى معاه فى الكلام من خلال شيخ متمرس يكون شيخ جامد كده يقدر يتعامل مع جن الرصد بيبقى اسمه
“شيخ العزيمه”والشيخ دى انت بتبقى جايبه ودافع ليه دم قلبك علشان يوافق يجى معاك.
طبعا كل أنواع جن الرصد أنواع مؤذية جدا وممكن يسبب لك الكتير من الاذي زى مثلاً.
القتل والوفاة فى ظروف غامضة مش فى ظروف عاديه لا فى ظروف غامضة.
المس الكهربائى والصرع والجنون.
ممكن كمان الشلال و العمى.
طيب ازاي تعرف أن المكان دى فى جن رصد.
بصراحه سؤال مهم وفى عليه أكثر من دليل خد عندك يا سيدى.
اول دليل/ وجود ماء نتن الرائحه حاجه كده استغفر الله العظيم.
تانى دليل/ تسمع أصوات و همسات تجبرك على انك تسيب المكان فورا.
تالت دليل /تلقى الحجاره بتاعت المكان تتساقط عليك وممكن تقفل المكان تانى حتى لو الناس فى ودى ممكن يسبب فى وفاة الناس نتيجه ل نقص الاكسجين.
طبعا علماء الآثار قالوا مفيش حاجه اسمها جن رصد ودى اي كلام وخلاص الهدف منه النصب عليك و ياخدوا منك فلوس كتيرررررر.
وان أحنا عمرنا ما طلع لينا جن الرصد دى على الرغم من اكتشاف مقابر كتيررررر .
علشان كده الحكومه قالت اللى هلمحه ب يحفر فى الأراضى علشان كنوز وآثار القدماء المصريين همرجحه.
وهيتم معاقبته ب الحبس ٣سنين أو ممكن ١٥سنه أو ممكن كمان توصل ل المؤبد .
ماهو الموضوع مش بسيط دى آثار ياعم الحج.
قولى انت بقا رائيك ايه؟
عمرك سمعت عن جن الرصد دى ؟
لو سمعت احكيلى فى التعليقات !
رايك مهم
#هبه جمال
