الرضا بالمقسوم عبادة….. دكتورة غاده مبارك
هل يتعارض الرضا مع الطموح ؟ وهل نكتفي بالرضا عن أوضاعنا دون السعي لتحسينها وخصوصاً إذا كانت سيئة أو غير موفقة
![](https://1010eg.com/wp-content/uploads/2022/12/Screenshot_٢٠٢٢١٢٢٧-٠٦١٩٢٧_Facebook-480x470.jpg)
القاهرة
د/ غادة مبارك
الإجابة عن السؤالين دول بالعقل كده لأ ، بنرضى وبنحمد ربنا على كل حاجة وكل حال لكن في نفس الوقت لابد يكون عندنا طموحات وأهداف وآمال بنسعى لها ونبذل مجهود فعلي وحقيقي إننا نوصل لها ، مبدئيا نكون مقتنعين إن وما نيل المطالب بالتمني ولكن تؤخذ الدنيا غلابا، وغلابا هنا مش معناها كدهو وبالعافية على رأي الأستاذة سعاد حسني ، لا معناها بالعمل والإجتهاد والأخذ بالأسباب، ” وأن ليس للإنسان إلا ما سعى” ، ما هي أحلام حضرتك مش هتحقق نفسها وأنت قاعد على الكنبة ولا مريح على السرير وماسك تليفونك وبتلعب، طبيعي إن كل واحد عايز يحقق شيء يمشي في سكة الشئ ده ويركز في متطلباته ويشتغل عشانه وأنا هنا مش بناقش قيمة العمل في حد ذاتها اللي هي أصلا أمر بديهي ولو إني أعرف ناس مش بتعمل حاجة في حياتها غير إنها تاكل وتشرب وترازي في مخاليق ربنا وتسب وتلعن فى الدنيا والظروف والعيشة واللي عايشينها دول مش موضوعنا خالص هنا .
تاني حاجة تيجي بعد السعي في الترتيب لكنها لا تقل أهمية عنه هي المرونة في تحقيق هدفك ، الدماغ الناشفة وتحجيرة المخ مبتأذيش غير صاحبها، فلا مانع إنك كل فترة تقعد وتحاسب نفسك وتشوف هي طريقتك صح ومناسبة وناجحة ولا محتاج تعدلها وتصلحها ، وما تاخدكش ساعتها العزة بالإثم وتعند مع روحك وتصلب رأيك اللي ممكن يكون غلط لأننا بشر وعادي نغلط أو يمكن في طريقة تانية أنجح وأصح ماهو حتى الصح فيه تعددية يعني تحل المسألة بطريقتين مختلفتين ويدوك نفس الحل ، معنى ده إن الإنسان ممكن يغير أسلوبه طالما لم يحقق هدفه ، أنت كمان ممكن تشيل أهداف وتزود أهداف وأنت في السكة مش بس كده ده أنت ممكن تغير أهدافك خالص مع الوقت ومع الأولويات ومكتسبات شخصيتك ماهو لا عيب ولا حرام ،اللي مش ممكن يتغير هو الثوابت والقيم .
أنت مطلوب منك تعافر وتستمر طول ما فيك نفس وإياك اليأس يتمكن منك ولا تستسلم صحيح هتيجي عليك لحظات ضعف وبالذات مع تكرار المحاولات الفاشلة ،ساعتها لازم تفكر نفسك إن طبيعة الكون كله فيها نسبة من الإهدار أو عدم النجاح بمقياسنا احنا ، في مرة قريت إن نسبة نجاح الأسد في اصطياد فريسته بتكون ٢٥٪ يعني من كل ١٠٠ مرة بينجح ٢٥ بس ومع ذلك هو ملك الغابة، ونص بيض السمك بتاكله أسماك تانية ،وثمار الأشجار وبذورها بتاكلها العصافير ، وأغلب المطر بينزل في المحيط، ومع ذلك الكون مستمر ، عشان كده من فضلك حاول وحاول وأقع وقوم وكمل معافرة، اعمل اللي عليك الأول وبعدين ارضى بالنتيجة .